السلام عليكــــــم ورحمة اللــــه وبركاته
ويسعد مســــاكم جميعــــــــــــا
عن جد انا كتير حزينة وكتير مقهورة لهالحالة يلي وصلنا الها
شو صاير النا ؟؟ خلاص خلصت كل مشاكلنا وفضينا وما صار ورانا شي غير انه نسب ونشتم ونتريق بالشيعة ؟؟
كل يوم والتاني كمية ايميلات من جروبات مختلفة شوفوا الشيعة شو بياكلوا شو بيشربوا شو بيفتوا شو بيعملوا
الفنان الفلاني طلع كلب وحمار وبطيخ بسبب انه بيمارس طقوس مذهبه الشيعي
الشيخ الفلاني نازلين عليه مسخرة وتريقة بسبب فتوى طلعها خاصة بالمذهب الشيعي
شو فيكم يا جماعة اعقلوا شوي واكبروا عن هالتفاهات
لا ديننا ولا اسلامنا ولا رسولنا عليه الصلاة والسلام يرضى باللي عم بيصير
وبعدين لما الرسام الدنماركي رسم كاريكاتير بيسخر فيه من ديننا ومن رسولنا شوفو كيف انقهرنا ولحد هلأ بننادي بحملات المقاطعة ...
ولما شارون فات على المسجد الاقصى قامت انتفاضة فلسطينية راح ضحيتها آلاف الشهداء
الشي الوحيد اللي ما ينفع تمسه ولا تهينه ولا تسخر منه هو عقيدة الانسان
شو ما كان رأيك انت بهالعقيدة وبهالمذهب احتفظ فيه لنفسك ..
انت شايف انه مذهبك ودينك هو الحق وهو الصح وبتحمد الله ليل نهار انه هداك لهالدين
نفس هالنظرة شايفينها اخواننا من المذهب الشيعي لمذهبهم وشايفينها اليهود والنصارى لديانتهم
كل واحد بيحب دينه وبيحب مذهبه ومقتنع فيه تمام الاقتناع لشوو نيجي نحنا وبكل جهل وحماقة نسب ونتريق على هالمذاهب والاديان ؟؟
فيه ثقافة غايبة عنا وهي احترام الآخر يعني اي واحد اختلف معنا صار ضدنا وصار عدونا لشوو طيب هالنظرة السطحية للأمور ؟؟
اكيد مو كل الناس راح تتطابق بنفس التفكير ونفس الدين ونفس المعتقدات ولا ماكان فيه خير وشر وجنة ونار
يتحدد بعدها مصير كل واحد بعد محاسبة الله للعباد مو محاسبة العبد للعبد ؟؟
وبعدين الله نزل بكتابه الكريم
( انك لا تهدي من احببت ولكن الله يهدي من يشاء )
فمو كل واحد يعمل انه هادي البشرية على هالارض !!
من كم يوم اجا واحد بيحاكيني مفكرني عالمذهب الشيعي وبيحكي لي ممكن مناظرة بيني وبينك ؟ فرديت له وكيف عرفت اني شيعية قالي عشانك
سورية واهل سورية اغلبهم شيعة ما بعرف من وين جاب هالمعلومة لكن ما علينا .. فضولي لسماع مناظرته خلاني كملت معه الحوار على اني شيعية
وبلش بالمناظرة وقالي انا بدي اهديكي للحق وللصواب .......... الخ لحد ما وصل للاستهزاء ببعض ما يؤمن به الاخوة في المذهب الشيعي وكان
اسلوبه قمـــــة في الاستفزاز وكلامه من نوعية بالله عليكي في حدا عاقل يعمل كذا وكذا ؟؟ وانتوا فيكم وانتوا عليكم ومذهبكم هادا مسخرة و .. و.... ....
انا مو شيعية بس ما انكر انه استفزني جداااااااااااااا ليش التحقير والسخرية والاستهزاء بالآخرين وبأعز شي عندهم وهو عقيدتهم !!
بدك تسوي حالك شيخ وبتهدي الناس وتسوي مناظرات قبل هاد لازم تكون مؤهل لهالشي مو اي واحد يجي يتفلسف و يخبص كلمتين مع بعض يخلي
اللي قباله يكرهه ويكره دينه ويكره مذهبه ولو هو عارف انه انت صح وهو غلط عناد فيك بسبب اسلوبك راح يكابر وراح يضل ماشي بالغلط
طيب ليش هيك ؟؟؟ ما الله جعلنا طبقات وجعل لكل منا اختصاص فما بينفع حدا يتفلسف بمجال مو مجاله
فيه علماء دين افاضل هن اللي مؤهلين للدعوة وللمناظرة والافتاء بالدين
بدك يكون الك دور وتدعي الناس لدينك ومذهبك فهادا بيكون باخلاقك وحسن اسلوبك بالتعامل مع الناس
مو بالسخرية والاستهزاء ... !!!
سبب كتابتي لهالموضوع هو وانا بتصفح بايميلي لقيت ايميل مبعوت من واحد من الشيعة وحاط صور لعلماء بالمذهب الشيعي وكاتب تعليق على صورهم
شوفو النور اللي على وجوه علماؤنا وبعدها حاط صور لعلماء السنــة وحاط تعليق تحت صورهم وشوفوا الظلام والخبث على وجوههم !!
انا وصلني الايميل وغلى الدم بعروقي وعصبت واستعديت لشن هجوم مباشر غير محسوب العواقب على صاحب الايميل
بس بعدين جلست بيني وبين نفسي افكر طيب هو ليش عمل هيك وليش كتب هالايميل ؟؟
اكيد انه رد فعل بسييييييييييييييط جدااااا على اللي كل يوم بينكتب عن مذهبهم
طبعا هو تصرف احمق انا ما بدافع عنه بس فيه قانون بيحكي انه لكل فعل رد فعل
ونحنا كانت لنا المبادرة بالفعل ومو فعل واحد بالافعال حسيت فيهم كيف هالموضوع بيكون مؤذي للمشاعر
وكيف بيخلي الواحد يكره ويحقد على الطرف التاني .... ,,,
بس كمان هادا ما دخله بالاديان والمذاهب وما فينا نحكم على مذهب كامل بسبب تصرف شخص احمق وجاهل ومتعصب
ومو كل واحد تصرف بحماقة يكون الرد عليه بحماقة متله لازم نرتقي عن هالحماقات وهالتفاهات ونتعامل مع اشخاص مو مذاهب ومعتقدات .... ناس كتير مو مسلمين اصلا بس اخلاقهم ارقى من ناس كتير مسلمين للاسف ..!!
لازم نتعاون كلنا مع بعض لنمنع متل هالشغلات العقيمة يلي ما بتيجي من وراها غير الضرر والفتنه
بعرف بعض الجروبات المحترمة يلي بتمنع متل نشر هالايميلات من الطرفين
لكن مقابل هالجروبات اضعاف مضاعفة من اللي بتسمح بنشرها بل اتأسست اصلا لهالغرض
وبعدين نحنا ما بدنا كل شي بالمنع والحجب بدنا ننشر ثقافة بحيث انه الواحد يقتنع من نفسه انه هالشغلات لا من ديننا ولا من اخلاقنا
وانه هاي ما دخلها بالدمقراطية ولا حرية الرأي هالشغلات دخيلة علينا من برة لزرع الفتنة بيناتنا ونحنا موجهين مع الموجة بس ادوات بيستخدمها
غيرنا ليضرنا فيها ولا من امتى كنا نسمع عن هالكم الهائل من الصراعات بين السنة والشيعة في كتير من الدول العربية ؟؟
ما بعتقد حدا فينا جد عالتاني ,,,,, كلنا عايشين مع بعض ومتواجدين من زمان وما كان فيه اي حساسية او مشكلة
ياريت نفكر بوعي اكبر وبحكمة ورقي قبل لا نتصرف اي تصرف محسوب علينا ...
تحيـــــــــاتي للجميـــــــــع
جينــــــــــــا
--~--~---------~--~----~------------~-------~--~----~
لقد تلقيت هذه الرسالة لأنك مشترك في مجموعة قٌٍرٌٍوٍبٌَِ قٌٍلوٍبٌَِ آلعًٍآشًِْقٌٍيَنْ .
لتقوم بارسال رسائل لهذه المجموعة ، قم بارسال بريد الكترونى الى
jarh5000@googlegroups.com
لإلغاء الاشتراك في هذه المجموعة، ابعث برسالة الكترونية الى
jarh5000-unsubscribe@googlegroups.com
لخيارات أكثر , الرجاء زيارة المجموعة على
http://groups.google.com.sa/group/jarh5000?hl=en
-----------------------
أثبت وجودك لا تقرأ وترحل شارك معنا ولو بأيميل واحد
لمن اراد التوقف عن استقبال ايميله من المجموعة
يرسل بريد الى jarh5000@hotmail.com
ويكتب يرجى التوقف عن ارسال رسائل البريد الإلكتروني من المجموعة.
وسيتم الغائه خلال 24 ساعة
--------------------------------
Who wants to stop receiving messages from the group
Send mail to Jarh5000@hotmail.com
.Please stop writing and sending e-mail messages from the group
Will be canceled within 24 hours
-~----------~----~----~----~------~----~------~--~---
No comments:
Post a Comment